RACINE INFO : Ayiti | Politik : Konseye-Prezidan Fritz Alphonse JEAN voye yon mesaj pou fòs lòd yo ak popilasyon an
Nan Yon nòt ki rive jwenn Sal Redaksyon Jounal RACINE INFO, Jounen madi 26 Novanm 2024 la, Biwo kominikasyon Konseye-Prezidan Fritz Alphonse JEAN di li kontinye salye kouraj fòs lòd yo ak popilasyon an ki kanpe doubout nan batay lannwit kon lajounen pou n retabli sekirite nan peyi a.
Yon lòt bò, biwo kominikasyon Konseye-Prezidan an deklare sistèm ekonomik vyolans ak move gouvenans politik ki ta p taye Banda nèt alkole nan peyi a, ki lakòz anpil moun pèdi lavi ak byen yo pa gen plas li ankò nan peyi a.
« Twòp San Koule!!! Se Twòp Atò!!! », se mesaj sa a ki montre nivo endinyasyon biwo a.
« Si sèten gouvènman pase la yo te kwè nan kreye sistèm banditis ak kriminèl pou Kenbe pouvwa, enben nou menm nan leta sa a, nou konnen sistèm banditis pa janm konstwi peyi se detwi li detwi peyi », se sa nou li nan nòt Sila a.
« Fòk ansanm nou fè kwa sou sistèm banditis sa kelkeswa kote l sòti
anwo tankou anba. Nou kontinye Bay fòs lòd yo enstriksyon e ankouraje popilasyon an nan sipòte lapolis jiskaske nou tabli bonjan sekirite pou tout moun ka rive jwenn lavi ak lapè yo, se dwa chak sitwayen pou viv nan diyite nan peyi a », se konsa nòt sa a ki pote non Konseye-Prezidan an, Fritz Alphonse JEAN, te konkli.
RACINE INFO
